عنوان الموضوع الاول عنوان الموضوع الثاني عنوان الموضوع الثالث عنوالن الموضوع الرابع عنوان الموضوع الخامس

قصيدة ارْفـَقْ يَامَالـْكِي / تـَاجْ الرّْيَامْ



قصيدة ارْفـَقْ يَامَالـْكِي / تـَاجْ الرّْيَامْ 
نظم سيدي قدور العلمي                                             مبيت ثلاثي

القسم الأول
اَرْفـَقْ اَمـَالـْكِي ْبعَبْدَكْ وَ اعْطَفْ يَـا صَابْغْ النـّْيَـــــــامْ
يـَا بَـدْرْ نْـبَـا مَـنْ الـْغـْتـَـامْ
يَـهْـديـكْ الله لاَ تْعَـذَّبْ قَلْـبِـي قَـصِـيـتْ مَـا كـْفـَــــــــا

اَنـْتَ الـْمُوصُوفْ بَالـْمْحَاسَـنْ وَ نـَا المَلـْسُوعْ بَالـْغْرَامْ
وَ عْـيِـيتْ مْلاَزَمْ السّْقـَامْ
اَمَـا بَرَّدْتْ مَـنْ جْـمَـارْ فـْقـَلْبِـي مُحـَالْ تـَنـْطْفـَـــــــــا

انـْـبَـاتْ نْـسَاهَـرْ اللـّْيَالِـي وَ دْمُوعِي حَايـْفـَا سْجَــــامْ
نـَبْكِي وَ نـُّوحْ فـَالظـْــــلاَمْ
اعْلـَى مَحْبُوبْ خـَاطْرِي مـَنْ جَارْ عـْلِيَّ وْ لاَ عـْفـَـا

اِمْتـَى يَا مَالـْكِي نـْشَاهَدْ خَدَّكْ يـَضْوِي عْلـَى الرّْسَامْ
مَـا بِـيـنْ مْحَافـَلْ الرّْيـَــــامْ
وَ نـْقـُولْ بـْرِيتْ مـَنْ عـْلاَلِي وَ نْسِيتْ مْحَايـْنْ الـْجْـفَا

رَغْبـُوا تـَاجْ المْـلاَحْ فِيَّ يَحْيـِينِي غـِيرْ بَالسْــــــــلاَمْ
وِ يرَاعِي سِيرْتْ الـْــــــكـْرَامْ
لاَ خِـيـرْ فـَاللـِّي جْفـَــــــــا حْبِيبُو بَعْدْ ايْامْ المْوَالـْفـَــا


القسم الثاني
فـَبـْهـَاكْ اَمَالـْكِـي افـْنِـيـتْ لاَ حَـالـَا كِـيـفْ حَالـْتِـي
فـَطـْرِيقْ هـْوَاكْ مَا عْيِيتْ حَـتَّـى تـَنـْقـْضـَى حَاجْتِـي
رَاضِـي بَـهْـوَاكْ مَا شْكِيتْ صَابَـرْ لـَضْـرَارْ عـَلـْتِّي
ِو لا نـَا نـَلـْـتْ مـَا نـْوِيــتْ مـَنـَّكْ يـَا رُوحْ رَاحْـتِــي

نـَفـْرَحْ وَ نـْقـُولْ مَا مَشـَى لِي تـَمْجَادِي فـَالـْبْهَا حْرَامْ
 وَ نـَا مَا ضَاعْ لِي انـْضَامْ
نـَسـْمَـعْ قـُولْ الحْـسُـودْ فِـيَّ يَـتْـكـَدَّرْ بَعـْـدْ مـَا صْفـَا

فـَايَـنْ الـْعَهْـدْ وُ الـْمْوَاثـَـقْ وُ احْنـَا خَاوَا بـْلا خـْصَامْ
 وُ مَا تـَسْمَعْ لـَلـْعـْدَا كـْلامْ
وُ الـْيـُومْ نـَا ضْحِـيـتْ العـْدُو وَ اعـْدَايَا لِيكْ رَايـْفـْا

شـَوَّقـْتـِينِي فِي ذَاكْ الـْبْهَا وُ اهْجَرْتـِينِي عْلـَى الدّْوَامْ
 الله اَ سـَابْــغْ الـنـّْـيـَـــامْ
انْشـَرْ ثـُوبْ الرّْضَا عـْلِيَّ وُ اطـْوِي ثـُوبْ المْخـَالـْفـَا

نـَعْتـَادَكْ صَاحَبْ الـُولاَعَا فـَابْيَاتْ الشـَّعْرْ وُ النـّْضَامْ
 وُ ابْـرَاوَلْ مَـا لـْهَا سْوَامْ
وُ انـْعـَرْفـَكْ صَاحَبْ اللـّْطـَافـَا وُ الرَّافـَا وُ المْسَاعـْفـَا

رَغْبـُوا تـَاجْ المْـلاَحْ فِيَّ يَحْيـِينِي غـِيرْ بَالسْــــــــلاَمْ
وِ يرَاعِي سِيرْتْ الـْــــــكـْرَامْ
لاَ خِـيـرْ فـَاللـِّي جْفـَــــــــا حْبِيبُو بَعْدْ ايْامْ المْوَالـْفـَــا

القسم الثالث
امَـا دَوَّزْتْ مَـنْ وْقـْـــــاتْ كـُنـْتْ مْـغَـطـِّي ابْثـُـوبْـهَـا
تــَسـْوَى اليـَـاقـوتْ وَ التـْقـَاتْ وَ السَّـعْـدْ اسْـكًَـامْ مَـنـْهـَا
وَ الكـَـاسْ مْـدَامْـعـُو اجـْرَاتْ اعـْلـَى الشـَّمْعـَا وُ ضِيْهـَا
مـَا تـَسـْمـَعْ غِـيـرْ كـُبْ هـَاتْ وَ الخَـمْـرَا بـَاحْ سَرّْهـَا

فِينْ ايّْامْ الزّْهـُو الـْبـِيضَا وَ انـْتَ نـَشـْوَانْ بَالـْمْـدَامْ
سَالِي فـَبْسَاطـْنـَا هـْمَامْ
مَحْجُوبْ اعْلـَى عـْيُونْ لـَعـْدَا وَ عـْلِيكْ التـَّاجْ مَا خْفـَا

صَدْقـُو مَـنْ حـَدْثـُّو وُ قـَالـُو مَا دَامْتْ لـَزّْهـُو ايَّامْ
لـُـو كـَانـْتْ تْـدُومْ لـَلـْـقـْدَامْ
لــُوكـَانْ الشـَّمْـسْ فِـي سـْمـَاهَـا تـَبْقـَى دِيمَا مـْشـَرّْفـَا

كـُنـْتِـي عـَنـْدِي بْحـَالْ رُوحِـي وَ نـَايـَا لـِكْ كـَالـْغـْلامْ
نـَخْـضَـعْ وَ نْقـَـبَّـلْ الْقـْدَامْ
و نـْبـَايَـعْ لِـكْ غـِيـرْ نـَـنـْـظـَرْ وَجْهـَكْ يَا شـَارْدْ الـْعْفـَا

امَا صَبـَّرْتْ خـَاطـْـرِي كـَانْ يـْدُوزَكْ مـَا رْضَا حْكـَامْ
وَ احـْلـَـفْ السـَّعـْدْ لا سـْكًامْ
مـَا بِـدِي مـَا نـْدِيـرْ نـَطـْلـَـبْ مـُولايَـا يـْجُودْ بـَالشـّْفـَا

رَغْبـُوا تـَاجْ المْـلاَحْ فِيَّ يَحْيـِينِي غـِيرْ بَالسْــــــــلاَمْ
وِ يرَاعِي سِيرْتْ الـْــــــكـْرَامْ
لاَ خِـيـرْ فـَاللـِّي جْفـَــــــــا حْبِيبُو بَعْدْ ايْامْ المْوَالـْفـَــا
 

القسم الرابع
هـَـذِ مُـدَّا بْـلا حْـسـَــــابْ وَ نـَــا كـَامِــي اعـْلايـْلِي
نـَتـْسَنـَّى سَـاعْــتْ الـصـّْـوَابْ نـَـقـْضِـي فِـيـهـَا مْسَايْلِي
كـَنـَطـْلـَبْ عـَاتـَقْ الـرّْقـَابْ يـَجْـمَـعْ بـِـيَّ اغْـِزيّْـلِــي
مـَحْـبُـوبِـي رَاشـَقْ الهْـذَابْ نـَايـَـرْ الـخْـدُودْ قـَاتـْلِي

صَرْصَرْ عـَنِّي وُ شـَافْ فِيَّ وَ ابْهـَضْنِي مَالـْكِي وُهـَامْ
كـَبـَازْ هْـوَى عـْلـَى حـْمَامْ
وَ اتـْرَكْ جـَسْمِي انـْحِيلْ فـَانِي مـَقـْسُومْ عَلْ المـْنـَاصْفـَا

لـُو صَبْتْ نـْعِيدْ لِيهْ سَرِّي وَ نَـا وَحْدِي ابْلا زْحَامْ
لـُو كـَانْ رْقـَصْتْ بَالكـْمَامْ
عَسَّـى يـَرْطـَابْ خـَاطـْرُو مَكـْمُولْ الصُورَا المْشـَرْفـَا

مـَالـَكْ مَـا فـَادْ فِيـكْ تـَمْجَادْ وَ لا رَغـْبَا وُ لا ذْمَامْ
يـَا تـَابَعْ سِـيـرْتْ الغْشـَـامْ
دَابـَا رَبِّـي مَـنْ الـْجـْمَـالْ يْسَلـْبَـكْ يَنـَاقـْـصْ الوُفـَا

نـَطـْلـَـبْ رَبِّـي اللـِّـي ابْلانِـي يـَبْلـِيـكْ بْلـِيعْتْ الغـْرَامْ
حَتـَّى تـَكـْـرَهْ الطـّْعـَــامْ
وَ اجْـمَـارْ الـْبـِيـنْ فـِي امْهـَاجَـكْ تـَبْقـَى دٍيمَا مْشـَغـْفـَا

رَغْبـُوا تـَاجْ المْـلاَحْ فِيَّ يَحْيـِينِي غـِيرْ بَالسْــــــــلاَمْ
وِ يرَاعِي سِيرْتْ الـْــــــكـْرَامْ
لاَ خِـيـرْ فـَاللـِّي جْفـَــــــــا حْبِيبُو بَعْدْ ايْامْ المْوَالـْفـَــا

قصيدة اَلزَّرْدَا



قصيدة اَلزَّرْدَا
نظم محمد بن علي المسفيوي                                                    قياس السوسي

القسم الأول
ضِيفْ رَبِّي جِيتَكْ للَدَّارْ * زِدْ بِيَّ مَنْ غِيرْ اشْوَارْ * كَانْ كُنْتِ جَيَّدْ وَاكْرِيمْ * لاَ دِّيرْ امْعَيَا صَرْفْ الْبْخَالْ * ارْفَعْ بِيَّ يَجْزِيكْ خِيرْ رَبِّي * لاَيَنِّي سَامَعْ اَلْخْبَارْ اَعْلِيكْ اَلَوْلِيفْ * اَكْرَمْنِي فِي حَقّْ اَلجُّورَا * وُ دِيرْ مَا قَلْ الله * وَصَّاكْ عَلْ الضِّيفْ اَتْكَرْمُ * وَالْجَارْ بَرّْ بِهْ اكًْبَالاَ * وَلِّي اَبْخِيلْ رَبِّي دَمُّ * عَايَشْ فَالْمْكَرْ وَجْهَالآَ * لاَبُوهْ يَكْرَمْ لاَ عَمُّ * اَلْبْخْلْ فِيهْ حَقّْ اَسْلاَلاَ * وَلِّي اَكْرِيمْ رَبِّي كََرْمُ * كَتْبُ فْلاَمْتْ اَلْفُضَالاَ نَاسْ اَلْحْسَانْ * تَعْرَفْ وَصِْفي مَوْلُوعْ بَالزّْرَادِ * دَايَمْ فِي كُلّْ يُومْ اَنْحَبّْ الزَّرْدَا * لُو تْكُونْ اَفْبَغْدَادْ اَقْرِيبَا اَنْقُولْ * وَكْثِيرْ اِلَى كَانَتْ عَنْدْ وَاحَدْ مَثْلَكْ وَافِي اَكْرِيمْ جَيَّدْ صَبَّارْ * بَرّْ يَرْفَدْ بَالْعَارْ * فِي اَمْتَاعُ يَصْبَرْ * وَ لاَ اَرْضَى بَالْقَهْرَا * زِدْ بِيَّ لَدَّارْ اَسْرِيعْ كُنْ تَايَكًْ بَطَّارْ * يَجْزِيكْ اَلْقَهَّارْ * لا تْخَافْ وُ لاَ تَدْهَشْ مَا تْصِيبَكْ عَثْرَا * قُلْ بِكْ اَهْلاً وَ مْرَحْبَا وُ عَزّْ فِي كُلّْ اَنْهَارْ * اَتْفَضَّلْ بْلاَ تَقْصَارْ * فَرَّشْ اَلْقُبَّا وَعْمَلْ فِي وْسَطْهَا صَفْرَا * وَاَلّْدِي لِكْ اَنْقُولْ اَتْحَضّْرُ اَبْغِيرْ اَفْتِخَارْ * مَنْ اَنْعَايَمْ تُدْكَارْ * بَاشْ نَفْخُرْ وَنْصُولْ اَبْجُودَكْ عْلَى اَلْحَضْرَا
ضِيفْكْ اَجَارِي شَبَّعْنِي وُلِيسْ تَعْمَلْ بَشْوَارْ * زِدْ بِيَّ للَدَّارْ * بَالْحْسَانْ اَكْرَمْنِي وَلاَ اَتْكَثَّرْ هَدْرَا

القسم الثاني
هَاتْ لِي فَالاَوْلْ سَكْسُو * وُ لاَ تَخَلِّي حَدّْ اِمَسُّو * اِكُونْ فِي شِي طَبْسِِيلْ اَكْبِيرْ بَاَلزّْبَادِي رَاوِي * وَعْمَلْ اَعْلِيهْ غَنْمِي بَخْضَارِي رَايْقَا اَنْفِيسَا * دِرْ اَتْفَيَا مَنْ اَلزّْبِيبْ وُ لُوزْ وُ بَصْلاَ * كْدَاكْ سَفَّا بَفْرَاخْ مْنَ اَلْحْمَامْ * مَرْدُومَا وَ سْخُونَا مْعَ اَلشَّعْرِيَّا اَلْغَاهَا اَعْشِيقْ * وَ اَلرُّوزْ اِطِيبْ اَمْلِيحْ بَالْحْلِيبْ اَلصَّافِي * وَرَا مَنْ اَلْفْدَاوَشْ شَرْبَا * اَتْكونْ رَاوْيَا وَسْخُونَا * اِلَى اَدْخَلْتْ وَسْطْ اَلْقُبَّا * اَرَا طْوَاجْنَكْ وَصْحُونَا * لِيَّ اَتْقُولْ كُلْ اَمْرَحْبَا * هَاتْ اَلْبْسَاطَلْ اَلْمَحْسُونَا * وَ اَلُّوزْ فِي اَوْسَطْهَا يَنْبَا * وَكْدَاكْ بَاَلسّْمَنْ مَدْهُونَا * ومْحَنّْشَا اَنْحَبّْ اَبْرَغْبَا * اَتْكُونْ رَايْقَا مَتْقُونَا * طَبْسِيلْ جِيبْ لِي مَنْ بَغْرِيرْ * اكْدَاكْ سِرْ لَسَّفَّاجْ اَلْوَافِي اتْجِيبْ عَشْرَا كِيلُو * وَتْكُونْ بَالسّْمَنْ وُلَعْسَلْ * وَمْخَرّْقَا وُشَبَّاكِيَّا * وَحْدَ انْدِيرْهَا مَثْنِيَّ فِي كُلّْ جِيهْ * الْمَفْرُوطْ الْبَاهِي وُرَزَّتْ الْقَاضِي كَعْبْ اغْزَالْ وَالْكَعْكْ * اَمْيَا مَنْ لَغْرِيّْبَا تْقَدْ الْفْطَارْ * وَالْمَرْقْ بَاْلَبْزَارْ * جِبْ خُبْزْ السّْمِيدْ الصَّافِي يَعْجَبْ بَالنَّظْرَا * هَاتْ لِي كَبَابْ المَغْدُورْ ضَدّْ فَلِّي غَدَّارْ * فِيهْ بِيضْ ابْتَعْفَارْ * اكْداكْ جِبْ الْمَشْوي ِبِيقَامْتُ مَعْتَبْرَا * مَنْ الْكَفْتَا وَجَّدْ لِيَّ امْيَاتْ صِيتْ علَى النَّارْ * اكْدَاكْ اتْدِيرْ كْوَارْ * بَالْفْلافَلْ وِيْكُونُ فِي طْوَاجَرْ كُثْرَا * هَاتْ لَقْلِيَّا فَصْحُونَا مْزَوّْقَا مَنْ بَلارْ * كَاتْلَدّْ الَّفْكَارْ * وَالخْلِيعْ المَقْيُومْ اتْريعْ بِهْ الْفَكْرَا
ضِيفْكْ اَجَارِي شَبَّعْنِي وُلِيسْ تَعْمَلْ بَشْوَارْ * زِدْ بِيَّ للَدَّارْ * بَالْحْسَانْ اَكْرَمْنِي وَلاَ اَتْكَثَّرْ هَدْرَا

القسم الثالث
هَاتْ لَطْوَاجَنْ عَلْ لَشْكَالْ * مَنْ اَلْحَمْ اَلْغَنْمِي يُقْبَالْ * دِرْ طَاجِينْ اَمْخَضَّرْ يَا لْبِيبْ بَالزِّيتُونْ وُلِيمُونْ * دِرْ وَاحَدْ بَمْرُوزِيَّا مْعَ اَلْبْطَاطَا والَّفْتْ وُ لُوبْيَا وُ لَمْلُوخْيَّا * وَكْدَاكْ اَلْكْرُونَبْ وُ بُودَنْجَالْ وَ اَلطّْمَاطَمْ وَ اَلْكًَرْعَا وَاَلّْقِيمْ * وَ سْفَرْجَلْ اَمْقَلِّي مْعَ اَلْقَنَّارِيَّا * وَكْدَاكْ اَلشّْوَا يَغْجَبْنِي * مَنُّو خْرُوفْ جِبْ اَمْعَمَّرْ * وَاحَدْ بَعْدْ مَنُّو يَغْنِي * فَالفُرْنْ طَايَبْ وُمَتْحَمَّرْ * خَمْسِينْ رَاسْ بِهَا نَثْنِي * وَاَلْهَرْكًْمَا عْلِيهَا نَفْطَرْ * وَكْدَاكْ جِبْ لِي لَمْعَسَّلْ * نَبْغِي اَتْكُونْ عَايَقْ فَايَقْ وَسْطْ اَلنّْهَارْ نَعْطِيكْ اَخْبَارْ * جِبْ كًصْعَاتْ اَكْبَارْ * شِي اَدْشِيشَا كَرْدَاسْ يْكُونْ فِيهَا كُثْرَا * بَدَّازْ اَسْخونْ اَنْحَبُ يْكُونْ فِيمَنْ وَيْسَارْ * كَانْ هَطْلَتْ لَمْطَارْ * عَلْ اَلْبِيصَارْ اَمْوَجَّدْ مَانْطِيقْ اَلصَّبْرَا * هَاتْ لِي فُولْ اَمْدَمَّسْ مَنْ اَهْوَاهْ هَاجَتْ لَفْكَارْ * وُ مَنْ اَلْحَمَّصْ قَنْطَارْ * طِيْبُ وَاَلْبَاقِي تَكَْلِيهْ دُونْ اَلشَّهْرَا * جِبْ لِي بَرْكُوكَشْ بَحْلِيبْ طَايَبْ عْلَى اَلْمَقْدَارْ * فِيهْ نَفْدِيوْ اَلثَّارْ * مَنْ اَلصّْغُرْ يَعْجَبْنِي مَا صَبْتْ عَنُّ صَبْرَا
ضِيفْكْ اَجَارِي شَبَّعْنِي وُلِيسْ تَعْمَلْ بَشْوَارْ * زِدْ بِيَّ للَدَّارْ * بَالْحْسَانْ اَكْرَمْنِي وَلاَ اَتْكَثَّرْ هَدْرَا

القسم الرابع
هَاتْ لِي خَمْسِينْ ادْجَاجَا * رَدتّْ بِهَا نَقْضِي حَاجَا * بَالنّْوَى عَمَّرْ لِي عَشْرَا * وبَالسّْمَنْ عَشْرَ احَمَّرْهُمْ * زِدْ عَشْرَا بَاَلْمْعَدْنُوسْ وَ الفْلافَلْ * طِيَّبْ عَشْرَا مْزَعْفْرِينْ* وُمَرَّقْ لَخْرِينْ * هَاتْ لِيَّ بِيبِي وَالْوَزّْ بَعْدْ مَنُّو وَفْرَاخْ مْنَ الْحْمَامْ * خَمْسِينْ ازْوِجَا بَالتّْمَامْ * طَاجِينْ مْنَ الزَّرْزُورْ تَنْحَبّْ يُوجَدْ الّْفْطُورْ *عَنْدَاكْ لا تْكُونْ امْغَشَّمْ * وَغْزَالْ طَايْبَا مَقْيُومَا اِلَى اتْجِيبْهَا تُوقَفْ تَمْ * نُوصِيكْ لااتْكَثَّرْ لُومَا * امْيَا مَنْ الْقْنِيَّا تَقْدَمْ * وَتْكُونْ بَالشّْحَمْ مَنْعُومَا * وَمْيَا مَنْ الْقْنَافَدْ سَلَّمْ * فِيهَا اجْوَارْحِي مَغْرُومَا * وَكْدَاكْ لَحْجَلْ بِهْ انْتَمْ * لَرْنَبْ صُورْتُو مَعْلُومَا * تَمَّا اتْجِيبْ عَشْرِينْ مَنْ الشَّابَلْ طَايْبَا وَدْكِيَّا * وَخْرِينْ كِيفْهَا مَقْلِيَّا * فِيهَا انْضْرَبْ غَلْقَا تُشّكَارْ * لااتْحَضَّرْ لِي جَارْ * اتْرَكْنِي وَحْدِي وَصْغَى لِي الْقُولْ ابْجَهْرَا * هَاتْ شَرْغُ وَالْبُورِ جِبْ فَرْخْ مَنْ سَبْعْ اشْبَارْ * وَالْمِرِْلا تُدْكَّارْ * سَارْكََالاَ مَقْيُومَا جِبْ مَنّْهَا عَشْرَا * وَ الْقْرَبْ وُاَلنُونْ افْاكْلُ الْدِيدْ يَصْلَحْ لَصْيَارْ * لِيسْ تَنْسَا الْمَحْرَارْ * كَانْ بِيَّ بَرْدْ ابْطَعْمُ اضْرَارِ تَبْرَا * جِبْ سَرْدِيلْ ايْنَقْلا * وِيْتْجَمَّرْ افْصَهْدْ النَّارْ * لِيسْ تَعْمَلْ تَوْخَارْ * كُنْ مَحْزُومْ وُ مَنِّ لِكْ حَقّْ السُّخْرَا
ضِيفْكْ اَجَارِي شَبَّعْنِي وُلِيسْ تَعْمَلْ بَشْوَارْ * زِدْ بِيَّ للَدَّارْ * بَالْحْسَانْ اَكْرَمْنِي وَلاَ اَتْكَثَّرْ هَدْرَا

القسم الخامس
هَاتْ لَشْلايَدْ مُولاتِي * اعْلَى الْشْكَالْ اتْلَدّْ الْدَاتِي * وَالتّْرَاقَدْ فَخْلُولْ امْحَمّْضَا الْطِيفَا * حَضَّرْ صَفْرَا مَنْ الْعَنْبْ * وَحْمَلْ مَنْ دَلاحْ * هَاتْ بَطِّيخْ اكْبِيرْ وُ مَايْمَاتْلُ مَنْ فَكَُوسْ وُ لِنْكََاصْ * مَشْمَاشْ امْعَ التَّفَّاحْ مَنْ الْعَرْسَا شَامِي * وَالِّيمْ كَانْ يَحْضَرْ فَالْحِينْ * امْيَا انْحَبّْهَا قُدَّامِي * كَرْمُوسْ النّْصَارَا وَالتِّينْ * رَمَّانْ بِهْ لَذّْ اطْعَامِي * بَرْقُوقْ مَا يْلِي عنُّ لِينْ * فِي كُلّْ يُومْ قُنْطَارْ اِجِي مَعْلُومْ * واَلتّْمَرْ قُنطَارِينْ عْلَى الّْوَانْ * وَكََرْكََاعْ مْعَ الوُّزْ وَ الزّْبِيبْ البَيْضْ مْعَ المُوزْ * جِبْ لِي كَُوزْ مَنْ ابْلادْ الْهُنُودْ * وَاالْبَلُّوطْ اقُسْطَانْ * وَ الشّْرَابْ الطِّيَّبْ لَحْلالْ * جِبْ لَقْوَالَبْ مَنْ سُكَّارْ دِرْ شَايْ بِهْ الزّْرْدَا خْتَمْتْهَا * اَسْتَغْفَرْ الله مَنَْ اَعْتَرتْ الْسَانِي * انْطْلَبْ رَبّْ لَوْرَى يَبْسَطْ عَنَّا عْلَى الدّْوَامْ انْعَمْتُ * وَنْهَايَتْ الّْغَايَا يَا حَفَّاضْ خُدْهَا اخْرِيدَا بَرْزَتْ فَحْلُولْ رَايْقَا وَنْفِيسَا * صَعْبَا عْلَى الْجْحِيدْ الدَّامَرْ * وَعْلَى كُلّْ دَاعِي مَايَقْوَى لَلْحْرَابْ سَاعَتْ لَكَْحَارْ * بَالْحْسَامْ الْبَتَّارْ * كَانْ طَاحْ افْيَدِّي وِيحُو اَنْقَطّْعُ بَالشّْفْرَا * كَانْ يَجْحَدْنِي يَعْرَفْنِي افْمُكًَْْ عِينُ زَنْجَارْ * لِهْ نَسْقِي لَمْرَارْ * لُو اتْكَلَّمْ بَاسَلْ وَ اَثْقِيلْ بِينْ اَلشَّعْرَا * لُو ايْصَرْصَرْ بَازِي تَخْمَدْ كُلّْ مُكَا فَالْغَارْ * وَالسّْلامْ الّْحْبَارْ * وَالْشْيَاخْ وُ طَلْبَا وَعْلَى اوْلادْ الزَّهْرَا * مَنْ ابْنَ اعْلِي مَسْفِيويِ فِي اتْرَاجَمْ الْفَنّْ اعْبَارْ * زَارْ نَعْمْ المُخْتَارْ * سِيدْنَا مُحَمَّدْ لَحْبِيبْ تَاجْ العَشْرَا * الصّْلا وَالسَّلامْ اعْلِيهْ دَايْمَا كُلّْ انْهَارْ * مَنْ الْحَيّْ الْغَفَّارْ * قَدّْ مَاخَلْقْ اللَّهْ امْيَاتْ ألْفْ مَرَّ ا
ضِيفْكْ اَجَارِي شَبَّعْنِي وُلِيسْ تَعْمَلْ بَشْوَارْ * زِدْ بِيَّ للَدَّارْ * بَالْحْسَانْ اَكْرَمْنِي وَلاَ اَتْكَثَّرْ هَدْرَا

قصيدة الْقَلْـــــبْ





قصيدة  الْقَلْـــــبْ

      نظم الشيخ محمد بنسليمان                                    مكسور الجناح

القسم الأول
قَالْ يَنَا سِيدي * جَنَّبْ جَهْدْ مَا تَقْدَرْ يَا قَلْبِي مَنْ ابْنَادَمْ * وَعْلاَشْ مَنْ وَالَى لِكْ احْبِيبْ * لاَ غْنَا يَرْجَعْ لِكْ اطْلِيبْ * سَالْنِي نَعْطِيكْ التَّجْرِيبْ * يَاكْ اهْوِيتِي مَنْ لاَ هْوَاكْ وَنْتَيَا لِيهْ اعْشِيقْ * وَاسْقَاكْ امْرَارْ عْلَى اشْقَاكْ وَرْمَاكْ فْبِيرْ اغْمِيقْ *دَلاَّكْ وُ حَلّْ بْحِيلْتُ احْبَالُ * لاَكِنْ يَا الْقَلْبْ انْعَرْفَكْ بِينْ الْشْيَاخْ دِيوَانْ * وَنْتَ اخْبِيرْ لَتْمَادِي * وَنَا امْتَبّْعَكْ حَتَّى عَوَّلْتِي اتْخَرْجْ لَقْيَاسْ
وَعْلاَشْ هَكْذَا صَابَرْ يَا قَلْبِي * غِيرْ سَلَّمْ فَطْرِيقْ الْحُبّْ مَا تْرَى بَاسْ
القسم الثاني
قَالْ يَنَا سِيدي * فَوْلاَدْ جِيلْنَا مَا بَاقِي مَنْهُ الْبِيبْ فَاهَمْ * وَنَا مَنْ النّْصَحَا جِيتْ انْوَصِّيكْ * مَا بْقَاشِي مَنْ يَعْنَا بِكْ * مَنْ اخْفَا لَكْ فَعْلُ يُرِيكْ * لاَ كَلْمَا تُوجَدْهَا فْمَنْطْقُ لاَ عَاهَدْ مَوْتِيقْ* وِيلاَ سَحْرَكْ بَلْسَانْ حِيلْتُ عَنْدَكْ بِهْ اتِّيقْ * يَدْفَعْ لَكْ قِيمَتْ حَاجْتُ احْيَالُ * يَعْطِيكْ بَالْخْدَعْ فَالسَّاعا حَكْمَا احْلاَوْتْ الْسَانْ * وَالْقَلْبْ لِهْ فَرْصَادِي * يُورِي لَكْ الدّْهَبْ وِيلَى عِيَّرْتِيهْ تُوجْدُ انْحَاسْ *
وَعْلاَشْ هَكْذَا صَابَرْ يَا قَلْبِي * غِيرْ سَلَّمْ فَطْرِيقْ الْحُبّْ مَا تْرَى بَاسْ
القسم الثالث
قَالْ يَنَا سِيدي * وَاللهْ كَانْ مَا تَسْعَفْنِي حَتَّى اتْصِيرْ نَادَمْ * وِيلاَ تَسْعَفْنِي رُمْ اسْبِيلْ الْخِيرْ* كِيفْ رَامُوهْ اهْلْ التَّنْوِيرْ * بَالصّْفَا نَالُ خِيرْ اكْثِيرْ * وَالْغَادِي فَطْرِيقْ الْفْسَادْ لِهْ الشِّيْطَانْ ارْفِيقْ * وَالشِّيْطَانْ الِّي دَارْ بِهْ مَا يُورِي لِهْ اطْرِيقْ* اطْرِيقُ فِي دَارْ الْفْنَا افْعَالُ * فَعْلُ اِلى ابْغِيتْ اتْعَرْفُ يَنْبَا عْلِيهْ لَحْسَانْ * يَنْفَعْ فْدِيكْ وَفْهَادِي * وَحْسَانْ الصّْلاَحْ اِقُُودْ الْتَدْمِيرْ كُلّْ وَسْوَاسْ
وَعْلاَشْ هَكْذَا صَابَرْ يَا قَلْبِي * غِيرْ سَلَّمْ فَطْرِيقْ الْحُبّْ مَا تْرَى بَاسْ
القسم الرابع
قَالْ يَنَا سِيدي * لاَزَمْ مَنْ افْعَالِي تَبْكِي عِينِي بْدَمْعْ سَاجَمْ * وَالْقَلْبْ مَا هْوَ دُونْ اهْوَى الْمُخْتَارْ * نُوجْدُ فِي هَدِيكْ الدَّارْ * بِهْ نَنْجَا مَنْ صَهْدْ النَّارْ * وَنْسَلَّمْ فَطْرِيقْ اللّْعِينْ مَنْ قَبْلْ انْعُودْ اغْرِيقْ * وَنْتَ يَا رَاسِي لاَ شْ غِيرْ سَاهِي مَنْ نَوْمَكْ فِقْ * بَدْنُوبِي وَاسَقْ مَرْكْبِي احْمَالُ نَسْعَى مَنْ الْكْرِيمْ التَّوْبَا لَنُّ ارْحِيمْ رَحْمَانْ * نَعْمْ الْغْنِي الْجُوَّادِي * يَوْقِي مَنْ الْهَزْلْ عَتْرَاتِي حَتَّى انْرُومْ لَرْمَاسْ 
وَعْلاَشْ هَكْذَا صَابَرْ يَا قَلْبِي * غِيرْ سَلَّمْ فَطْرِيقْ الْحُبّْ مَا تْرَى بَاسْ
القسم الخامس
قَالْ يَنَا سِيدي * النَّاسْ غَابْطَا يَا قَلْبِي فَعْيَادْ وَ الْمَّاسَمْ * وَ نَا ارْمِيتْنِي فِي بَحْرْ الْمُحَالْ * تَاهْ جَفْنِي فِي هَدَ الْحَالْ * بِينْ مُوجْ افْسَادِي جُوَّالْ * وِيلاَ تَسْعَفْنِي لاَ تْدِيرْ فَوْلاَدْ الْيَوْمْ اصْدِيقْ * جَنَبْهُمْ وَقْصَدْ الصّْلاَحْ تَنْجَا مَنْ كُلّْ امْضِيقْ * وَلِّي قَصْدُ شُورْ الصّْلاَحْ نَالُ * نَالُوهْ بَالصّْفَا وَالتَّوْبَا نَاسْ الْوْفَا وُ لِيمَانْ * وَنْتَ امْتَبَّعْ افْسَادِي * ونَا رْمِيتْنِي بَجْهَلاَ فِي بَحْرْ مَايْلُ سَاسْ
وَعْلاَشْ هَكْذَا صَابَرْ يَا قَلْبِي * غِيرْ سَلَّمْ فَطْرِيقْ الْحُبّْ مَا تْرَى بَاسْ
القسم السادس
قَالْ يَنَا سِيدي * كَانُ ازْمَانْ لَجْوَادْ يْرَفْعُ شَانْ كُلّْ نَاظَمْ * وَالْيَوْمْ رِيتْ قَوْلْ الشَّاعَرْ مَهْمُولْ * افْجِيلْنَا غَابُو هَلْ لَعْقُولْ * مَا بْقَى مَنْ يَصْغَى لَلْقَوْلْ * امَهْبَلْنِي فِي عَامْ شَرْطْ فَبَجَدْ بَالتَّحْقِيقْ * قَلْبِي عَاشَقْ وَهْلْ لَغْرَامْ طَبْعِ عَرْفُوهْ ارْقِيقْ *غِيرْ السَّاكَنْ مَدْهِي عْلَى اشْغَالُ * شَغْلِي امْدٍيحْ طَهَ وَالْهَزْلْ عْلِيهْ جَايَرْ اُكَانْ *رَبِّ سَالْتْ بَالهَادِي * هَدِ مْنِيّْتِي يَهْدِنِي لَمْدِيحْ شَافْعْ النَّاسْ
عْلاَشْ هَكْذَا صَابَرْ يَا قَلْبِي * غِيرْ سَلَّمْ فَطْرِيقْ الْحُبّْ مَا تْرَى بَاسْ
القسم السابع
قَالْ يَنَا سِيدي * نُوصِيكْ يَالحَافَظْ حُلاَّتْ امْنَوَّعْ الْمْرَايَمْ * بِينْ الدّْهَاتْ غَنِّي بَلْسَانْ افْصِيحْ* خُدْ مَنْ مَاهَرْ قُولْ اصْحِيحْ بَالرّْيَاسَا وَ الْعَقْلْ ارْجِيحْ * واسْلاَمِي بَنْسِيمْ الزّْهَارْ لَهْلْ الْمَوْهُوبْ اعْبِيقْ * وَلِّي سَالَكْ سُولاَنْ عَنْ اسْمِي لِيهْ ابْلَى تَدْرِيقْ * خَبْرُ يَا رَاوِي ورَدّْ لُ اسْئَالُ *  مِيمِينْ يَالْفَاهَمْ وُ حَا وَالدَّالْ بَنْ اسْلِيمَانْ * وَلِّي سَالَكْ ابْلاَدِي * يَا حَافَظْ الْمْعَانِي قُلْ لُّ هَدْ الّْبِيبْ مَنْ فَاسْ
الدريدكة
     مَنْ فَاسْ مَا خْفَا وَ الاَصَلْ عَرْبِي  *  وُ لِيشَارَا مَعْنَى وَنَا لْبِيبْ قِيَّـــاسْ
     وَهْلَ الْهْوَى يْعَرْفُ سَالَكْ دَهْبِي  *  وَ التّْجَارْ اتْجَرْتْ مْعَاهُمْ تَاجَرْ اعْكَـاسْ
     بَسْلُوعْ نَاضِّينْ اوْسَقْتْ امْرَكْبي  *  وُ كَانْجُولْ فَبْحُورْ الْمَعْنَى ضْيَا وُعَسْعَاسْ
    وَيْحْ الْجْحِيدْ مَا يَقْوَى عَنْ حَرْبِي   *  كَانْ شَلاَ لاَبُدْ يْصِيبْ سَنّْ مَدْعَــاسْ
    وَنْهَيَتْ الّْغَا يَا فَـاهَمْ كَتْبِي *   اسْاَلْتْ رَبِّي يُوقِينَا مَنْ الْهَوْلْ وَكْبَــاسْ
    عْلاَشْ هَكْذَا صَابَرْ يَـــا قَلْبِي  *  غِيرْ سَلَّمْ فَطْرِيقْ الْحُبّْ مَا تْرَى بَــاسْ

قْصِيدَة مليكة



قْصِيدَة مليكة
للشيخ الحاج أحمد لغرابلي مكسور الجناح


القسم الأول
يَا مَنْ طْلُوعْ هْلاَلَكْ ¤ يَفْجِي اظْلامْ لَحْلاَكْ ¤ وَنْتِ شْمُوسْ لَفْلاَكْ ¤ لَلَّهْ جُدْ لِي بَوْصَالَكْ ¤ وَنْكِي بْزُورْتِي عَدَّالَكْ ¤ لَنِّي غْلاَمْ حُسْنْ اَجْمَالَكْ ¤ قَبْلْ اَلصّْيَامْ يَا مَلِكَا وَنَا غْلاَمْ مَمْلُوكْ ¤ وَمْنَ اَلْفْرَاقْ مَهْلُوكْ ¤ اِلَى تْزُورْنِي تَتْعَافَى ذَاتِي اَلْهَالْكَا ¤ لَوْ تَجْفِي قَلْبِي يْوَاصْلَكْ ¤ وِيلاَ دَزْتِينِي بْقَا اَلْعَارْ عْلِيكْ ¤ 
اَرَايَتْ اَلْمْلاَكَا * يَامُولاَتِي اَلْمَالْكَا * لِكْ اَلْعَبْدْ وُكُلّْ مَا مْلَكْ * نَصْرُو مَلِكَا *حْمَالْتْ اَلْمَلِكْ

القسم الثاني
مْحَاسْنَكْ وَسْرَارَكْ ¤ فَتْنَا لْكُلّْ مَنْ رَاكْ ¤ وَبْهَاكْ لِيسْ يُدْرَاكْ ¤ لاَزَلْتْ نَرْتْجَا بَشَّارَكْ ¤ يَاتِي اَلْمَرْسْمِي بَخْبَارَكْ ¤ وِيفِدْنِي بْصَحّْ اَمْزَارَكْ ¤ وَنْقُولْ سَعْدْ سَعْدِي وَكْمَلْ قَصْدِي فْيُومْ مَبْرُوكْ ¤ وَضْحَى الرّْقِيبْ مَتْرُوكْ ¤ اَنْجَدَّدْ لَفْرَاحْ وُ نَغْنَمْ سَاعَا مْبَارْكَا ¤ وَنَّادِيكْ الله نَاصْرَكْ ¤ مَنْ رَقَّى مَثْوَاكْ مَامْعَاهْ اَشْرِيكْ ¤
اَرَايَتْ اَلْمْلاَكَا * يَامُولاَتِي اَلْمَالْكَا * لِكْ اَلْعَبْدْ وُكُلّْ مَا مْلَكْ * نَصْرُو مَلِكَا *حْمَالْتْ اَلْمَلِكْ


القسم الثالث
مَا حَرّْ نَارْ فْرَاقَكْ ¤ وَ مَا عَزّْ مَلْقَاكْ ¤ رَبّْ لُوجُودْ رَقاَكْ ¤ قَلْبِي فْنَى وُ تَاهْ بْشُوقَكْ¤ وَاَلْجُودْ مَنْ اَوْصَافْ حْقُوقَكْ ¤ لَوْ كَانْ اَتْرَحْمِي مَعْشُوقَكْ ¤ تَفْدِيهْ مَنْ اَغْلاَلُ كِيفْ اَفْدِيتِي نَاسْ عَشْقُوكْ ¤ وَفْنَاوْ حِينْ فَرْقُوكْ ¤ اَنْتِي مْسَلّْيَا ونَا فَالسَّهْرَانْ وُ لْبْكَا¤ حِينْ دْلَعْ فَالتَّلْ سَابْقَكْ ¤ وَرْمَانِي خَلْفُ وُقَالْ لاَ يَلْقِيكْ¤

اَرَايَتْ اَلْمْلاَكَا * يَامُولاَتِي اَلْمَالْكَا * لِكْ اَلْعَبْدْ وُكُلّْ مَا مْلَكْ * نَصْرُو مَلِكَا *حْمَالْتْ اَلْمَلِكْ

القسم الرابع
اِلَى وْفَا مِيعَادَكْ ¤ رُوحِي اَنْهِيبْ لَفْدَاكْ ¤ نَنْكِي اَعْدَيْ وَعْدَاكْ ¤ نَبْغِي اتْوَدّْنِي وَ نْوَدَّكْ ¤ وَزْيَارْتِي جْعَلْهَا وَرْدَكْ ¤ حَتَّى اَحْبِيبْ مَالِي بَعْدَكْ ¤ يَا مَنْ كْمَالْ قَدَّكْ مَرْهَافْ سْقِيلْ هَازَمْ اعْدُوكْ ¤ وِيْحَدّْ اَلِّي يْحَدُّوكْ ¤ وَضْفَاَيَرْ اَلسّْوَالَفْ بَالطِّيبْ اَنْسِيمْهَا اَدْكَا ¤ تَسْبِي عَقْلْ اَلِِّي يْشَهْدَكْ ¤ وَ تْرَاصَعْ اَلَدّْرَارْ دِي تْشَابَهْ دِيكْ

اَرَايَتْ اَلْمْلاَكَا * يَامُولاَتِي اَلْمَالْكَا * لِكْ اَلْعَبْدْ وُكُلّْ مَا مْلَكْ * نَصْرُو مَلِكَا *حْمَالْتْ اَلْمَلِكْ

القسم الخامس
اَجْبِينْ بَدْرْ اَتْمَامَكْ ¤ مَهْمَا يْتُوكًْ فَسْمَاكْ ¤ يَحْمِي اَلِّي اسْتَحْمَاكْ ¤ مَنْ قَوْسْ حَاجْبَكْ وَنْيَامَكْ ¤ وَشْفَارْ هَازْمَا ظَلاَّمَكْ ¤ وَ الْخَالْ مْشَتْمَرْ بَحْسَامَكْ ¤ وَ الْخَدّْ وَرْدْ قَانِي فُوقْ ابْيَاضُ تْنِينْ عَمُّوكْ ¤ بَجْمَالْهُمْ خَتْمُوكْ ¤ الاَنْفْ زَانْ سَرَّكْ ¤ وَاَلشَّفِّينْ الْمْدَرْمْكَا ¤ وَالْمَبْسَمْ كَدُورْ خَاتْمَكْ ¤ بَالثَّغَرْ الْمَنْضُومْ جُوهْرُ يَسْمِيكْ

اَرَايَتْ اَلْمْلاَكَا * يَامُولاَتِي اَلْمَالْكَا * لِكْ اَلْعَبْدْ وُكُلّْ مَا مْلَكْ * نَصْرُو مَلِكَا *حْمَالْتْ اَلْمَلِكْ

القسم السادس
عَتنُونْ زَادْ انْوَارَكْ ¤ وَالْجِيدْ طَاوْسْ اَتْرَاكْ ¤ بَوْشَامْ لِيسْ يُدْرَاكْ ¤ وَنْوَابْغْ اَلصّْدَرْ دُكَّارَكْ ¤ وَضْعُودْ كَاسْيُوفْ اَعْقَارَكْ ¤ وَزْنُودْ رَايْمَا لَسْوَارَكْ ¤ وَكْفُوفْ نَادْيَا تَكْرَمْ بَنْدَهَا اَتْرَافْ عَزْرُوكْ ¤ وَعْلَى اعْدَاكْ نَصْرُوكْ ¤ فَحْلُولْ وَالْحْلِي شَلاَّ دَرْكَتْ قُومْ دَارْكَا ¤ بَقْلاَيَدْ فِيهَا اَجْوَاهْرَكْ ¤ تَبَارَكْ اَلْمُلْكْ سَرّْهَا يَسْرِيكْ

اَرَايَتْ اَلْمْلاَكَا * يَامُولاَتِي اَلْمَالْكَا * لِكْ اَلْعَبْدْ وُكُلّْ مَا مْلَكْ * نَصْرُو مَلِكَا *حْمَالْتْ اَلْمَلِكْ

القسم السابع
مَايَنْتْهَى تَوْصَافَكْ ¤ يَا مَنْ اَكْمَلْتْ بَوْفَاكْ ¤ شَلَّى مْحَاسَنْ اَصْفَاكْ ¤ بَالْقَلْبْ وَالّْسَانْ اَنْوَصْفَكْ ¤ وَنْفِيدْ بِكْ مَنْ لاَّ عَرْفَكْ ¤ حَتَّى اَتْوَدّْنِي مَنْ عَطْفَكْ ¤ كَافِي هْدَيْتِي بَحْسَانَكْ ¤ عَسَّا نْفُوزْ بَعْفُوكْ ¤ بَالْجُودْ نَاسْ وَصْفُوكْ ¤ لَوْلَا سْيُوفْ صَدَّكْ دَامْ الْعُشَّاقْ سَافْكَا ¤ شِي وَالَفْ مَنْ لاَيْوَالْفَكْ ¤ اَنْتِي قُوتْ اَلرُّوحْ كُلّْ رَاحَا فِيكْ
الدريدكة

رَصَّعْتْ فِي مْدِيحَكْ حُلاَّ بَلْفَاظْ سَالْكَا ¤ بِكْ ارْقِيتْ وُطَابْعِي سْلَكْ ¤
كَمَّنْ اَسَمْ فَلّْغَا اَنْسَبْتُ لِكْ
هَبْتْ اَلسّْلاَمْ لَمْقَامْ اَحْضَرْتَكْ يَالتَّايْكَا¤وَجْوَارَحْ لَعْضَا تْنَاجِيكْ¤
وَاَلسَّاكَنْ بَالسّْلاَمْ لاَزَمْ يْحَيِّيكْ
خُدْ اَلْبِيبْ مَنِّي هَذْ اَلدُّرّْ لَمْبَارْكَا¤وَسْطْ عْقُودْ بْدِيعْ جُوهْرَكْ¤
وَالنَّاظَمْ لَسْجَالْ ءَاسْمُ يُورِيكْ
الغْرَابْلِي الْحَاجْ اَحْمَدْ صَمْصَامْ الْمْدَاهْكَا¤كَمّْ مَّنْ دَاعِي فَلّْغَا دْهَكْ¤
لاَتَخْشَى هَتَّافْ رَايْدْ اِيضَاهِيكْ
مَجَّدْ لَبْهَا وُ خَلِّ جَمْعْ الْحُسَّادْ تَنْتْكَا ¤ وَغْنَمْ فَالسَّلْوَانْ سَاعْتَكْ ¤
مَا تَعْرَفْ فِي دَالزْمَانْ مَا يَاتِيكْ
وَسْعَى اَلدّْمَامْ لَلْعَدْرَا الَوْجِيبَا اَلْنََّسْكَا¤اِلَى جَادَتْ جُودْهَا مْسَكْ¤

الملحون , اصيل , تراث



فن الملحون ثرات اصيل وقصائد روعه

تعريف مختصر بفن الملحون وتاريخه
قصيدة الملحون:

تشير المصادر إلى أن أول بواكير فن الملحون قد ظهرت في العهد الموحدي، أي في القرن السابع للهجرة، إذ تطورت عن قصيدة الزجل في إطار الانعتاق والتحرر من بحور الخليل وكذا من صرامة اللغة المعربة.

فالملحون كلمة أطلقت على القصيدة الزجلية بالمغرب.

ولم تكن هذه القصيدة على جانب من التعقيد، بل كانت بسيطة، إن في أسلوبها الشعري، أو في جانبها الشكلي، إذ لم يكن الزجالون ينظمون في غير "الميت" وبالأخص البحر "المثنى" منه.

ولم يعترف بقصيدة الملحون إلا بعد أن كمل نضجها، وأصبح فنانوها ومنشدوها يأتثون البلاط السلطاني على العهد السعدي، واعتبارا من هذا العهد، أضحت هذه القصيدة ظاهرة أدبية معترفا بها وبقدرة شعرائها الذين طوروا قوالبها الشعرية، ونوعوا الموضوعات التي عالجوها، كما تطور أسلوب الغناء والإيقاع، وتغيرت الآلات الموسيقية.


ـ أغراض قصيدة الملحون:

وقد واكبت قصيدة الملحون الأمة المغربية، فعبرت عن كل عواطفها، ووصفت كل مظاهر حياتها الاجتماعية، وخاضت في كل فنون الشعر، ما يجعلني أزعم ـ مع من سبقوني لطرق باب دراستها أنها موازية للشعر العربي الفصيح من حيث هي مواضيع وأغراض، بل تفوقها من حيث هي معان.

ونذكر من بين المواضيع التي اختارها الزجالون أغراض لقصائدهم، موضوع التوسل وهو موضوع يشمل قصائد الندم والتوبة، وقصائد التضرع والاستغفار، وقصائد التسبيح والحمد ... وتصطبغ مضامينه بالكثير من المناجاة الروحية العالية المطبوعة بخالص الصدق والإشراقات الروحانية التي تخترق الحدود وتحلق عالية فوق الوجود

قْصِيدَة اَلنَّحْلَة


  
قْصِيدَة اَلنَّحْلَة

                 نظم السي التهامي المدغري                                  مبيت ثلاثي
القسم الأول 
سَهْلا وَاهْلاً بِكْ يَالنّحْلَة وَهْنِيَا يَالصَّيْلاَ صَلْتِ عَلْ الاطْيَارْ 
غَنِّي  بِينْ اَلْوَرْدْ وَ الزّْهَرْ           وَخْدودْ الزِّينْ وَالْعْيُونْ النْحَّارَا

        اوْحَا لِيكْ اللهْ فِي اكْتَابُ وُ الْهْمَكْ لَبْطَايْحْ الْعْفَا وَلْقِيطْ النَوَّارْ 
وَالجُولاَتْ فَاْلسَّهْلْ وَالوْعَرْ              وَجْعَلْ فِيكْ الدّْوَا وُحَكْمَا وَتْجَارَا

بَنْغَمَتْ التَحْنَانْ  بِينْ الْبَسْتَانْ يَا شَامَا الظّْرِيْفَا نَغْمِي دُونْ اُوتَارْ 
مَا مَثْلَكْ فَضَّا وُلاَتْبَرْ                 وَلاَ يَقُوتْ فِي ادْخَايَرْ لُُومَارَا

قَطْفِي قَطْفِي يَا لْبَاهْيَا سُوسَانْ وُغْنْبَاجْ وَالْحْكَمْ  وَالْوَرْدْ الْمَسْرَارْ 
وَ اسْكًَلْمَاسِي رَايْقْ النّْظَرْ              الطَمَّاجْ اُ امْدِيلْكَا وَالجَلاَّرَا

والْبَاغْ وُبَهْجَا  ازّْرِيرَقَا وَالشَّكُوكِي عَاشَقْ وُ اعْشِيقْ وَمَا صَلْحْ انْظَارْ 
وَالْخَابُورْ اشْقِيقْ لَلْبْهَرْ                  هَدَاكْ لْذَا صْفُورْتُو مَا تَتْوَارَا

وَ امْشَرْقَيَّا وُغَالْبَا وُيَاسْ وُنَسْرِي وَامْرِيجْنَا وُفَنْ وُزَهَرْ الْحَرَّارْ 
وَالْعَفْيُونِي بَاْلزْهُو احْمَرْ                 وَ الْخِلِي  فَالْبْطَاحْ خِيلُو غَيَّارَا

وَالدِّيدِي وَ الْخِيزْرَانْ يَعْدَلْ وَ مِيسْ اظْرِيفْ رَايَقْ مْعَ شَمْسُو شَوَّارْ 
مَتْهَلَّلْ وَجْهُو كْمَالْبْدَرْ                  فِي  لِيلَتْ وَاحْ دَارْتْ انْوَارُو دَارَا

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ 
أَتَرْيَاقْ عْلاَجْ كُلّْ ضَرّْ                  اَبَنتْ الْمُلْكْ لِيكْ هَمَّا وَاتْجَارَا


القسم الثاني 
جَاوَبْتْ النَّحْلا وُ قَالَتْ اعْشُوبْ الْبِيدْ حْلاَتْ لِي فَالْبْسَاتَنْ مَا بِينْ   اشْجَارْ 
وَجْمِيعْ الْحَرْجَاتْ وَالزْهَرْ                نَقْطَفْ مَنّْهُمْ مَانْغِيَّرْ نُوَّارَا

نَتْمَرَّحْ فَبْطَايْحْ الزّْهَرْ وَغْصَانْ الرِّيحَانْ فَالْجْبَالْ اَلْعَلْيَا فَقْفَارْ 
مَابِينْ الزَّرنِيجْ وَ السّْدَرْ                  وَنْرُوَّحْ لَلْجْبَاحْ بَعْدَانْ نَسْتَارَا

وُنْوَجْدْ اَلْمَلِكْ فِي مْقَامُ وَ الْكَلْمَا نَافْدَا عَنْ وَصْفَانُ وَحْرَارْ 
وَبْطَالْ الْعَسَّا عْلَى النّْمَرْ                  مَاتَرْقَدْ مَاتْنُومْ سَرْبَا بَتَّارَا

بَالنَّبْلْ الْمَسْقُولْ وَالْمْزَارَكَْ وَرْمَاحْ الْهَنْدْ وَالشْنَايَرْ تَرْمِي بَشْرَارْ 
تَهْزَمْ السَّرْبَاتْ بَالْبْتَرْ              وَتْعَيَّطْ فَاللّْطَامْ يَاخِيلِي غَارَا

وَتْسَدِّي تَسْدِيدْ فَايَقْ اَعَلْ الْهَنْدَسَا كُلّْهُمْ مَاتَقْوَى لُ شُطَّارْ 
حَتَّى  الطَّاوَسْ بَعْدْ مَاعْبَرْ             فِي شَكْلِي حَارْ مَانْفَعْتُ لَشّْطَارَا

وِيلاَ عَمْرْ الشَّهْدْ بَالْخْزَايَنْ نُرِيكْ اصَاحْ سِيرَتْ الْكُرَمَا لَحْرَارْ 
مَنْ جَابْ الدُّخَّانْ وَالجّْمَرْ               يَتْكَفَا بَالْحْسَانْ مَنْ غِيرْ امْرَامَرَا

وَكْدَاكْ النَّخْلا احْبِيبْتِي بَنْتْ اجِوَادْ اَلنَّاسْ وَالْفْضَلْ مُولاتْ الدُّكََّارْ 
لَوْتَرْمِيهَا حَقّْ بَالْحْجَرْ                 تَعْطِيكْ الْخِيرْ وَالتْمَارْ اَْلمَخْتَارَا

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ 
أَتَرْيَاقْ عْلاَجْ كُلّْ ضَرّْ                     اَبَنتْ الْمُلْكْ لِيكْ هَمَّا وَاتْجَارَا


القسم الثالث 
كُلْتْ الْهَا وَسْبَابْ طَاعَتْ اجْنُودَكْ لَلْمَلِكْ كَافَّا لَكْبَارْ وُالصّْغَارْ 
لاَ حِيلاَ لاَغَشّْ لاَانْكَرْ            عَنْدْ الْكَلْمَا ايْحَقّْقُ كُلّْ ايشَارَا

مَايَبْنِوْ حَتَّى اْيْسَبّْقُ دَارْ الْمُلكْ عْلَى الْسَاسْ حُسْنْ سُورْ وُ لَدْيَارْ 
فَقْصُورْ التَّشْيِيدْ وَ الْفْخَرْ             مَابِينْ ابْطَالْ حَرْبْ هَجْمَا وَدْسَارَا

قَالَتْ مَاعَنْدِ اوْزِيرْ طَمَّاعْ ايْدَارِ هَلْ الْمَالْ اَلَوْ كَانُ فَجَّارْ 
وَلِّي هُوْ مَوْسُومْ بَالْفْقَرْ               لَوْ كَانْ اَبَّاهْ ايْرَتْمِيهْ اَلْقْفَارَا

وَالسَّلْطَانْ اطْبِيبْ وَالرّْْعِيَّا مَضْرُورَا لا َوْزِيرْ لِيهْ  ايْبَلَّغْ لَخْبَارْ 
وِيجِيبْ الشّْرْبَا لْمَنْ اتْضَرّْ            وِيلَى خَانْ لُوزِيرْ بَعْدَتْ لَمْزَارَا

كُلْتْ الْهَا قُلْتِي الْحَقّْ وَ الْحَقّْ اعْلِيهْ النُّورْ مَاخْفَا نُورُ عَلْ لَبْصَارْ 
مَنْ يَمْشِي فَالضَّوّْ مَاعْثَرْ              وَالْغَادِي فَاَلظّْلاَمْ خِيلُو عَثَّارَا

سَمْعِي يَاشَمَا الضّْرِيفَا نَاسْ الْحَلْمْ اوْلاَدْ الْمْشَرَّفْ نَسْلْ الْمُخْتَارْ 
ذَاكْ النَّسْبْ الْعَالِي لَقْدَرْ              يَتْعَاطَاوْ الْحْقُوقْ نَعْمْ الصَّبَّارَا

رَبِّي يَحْفَظْهُمْ مَنْ امْكَايَدْ مَنْهُ غَشَّاشْ كَابَرْ عْلَى الْخَدْعَا نُكَّارْ 
سَاكَنْ وَسْطْ احْجَرْتْ النّْكَرْ         مَنْ قُومْ اقْسَافْ مَنْ امْعَادَنْ نُكَّارَا

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ 
أَتَرْيَاقْ عْلاَجْ كُلّْ ضَرّْ               اَبَنتْ الْمُلْكْ لِيكْ هَمَّا وَاتْجَارَا 



القسم الرابع
أسْمَعْ قَصَّتْ عَاصَرْ الْعْسَلْ مَنْ انْوَاعْ النَّعْمَاَ انْزَايَهُ مَا  بِينْ الحَضَّارْ 
تَايَعْزَلْ فَالشَّهْدْ وِ اخْتَرْ                  وَ اَلْفَرْجَا فَالدّْجَا وُ لَبْنَاتْ اسْكَارَا

وَدْوَاتْ الشَّمْعَا الْبَاهْيَا قَالَتْ سَوَّلْنِي انْعِيدْلَكْ اَصَاحِي لَخْبَارْ 
قَصَّا دِيّْ اكْلاَامْهَا اكْثَرْ               بِينْ الدُّهَاتْ وَالْفْحُولْ الشُّعَارَا

كُنْتْ  افْوَكْريِ كِفْمَا احْكِيتْ اَنَا وَشْقِيقِي امْعَ اهْلِي فَمْنَازَهْ وَدْيَارْ 
بِينْ جْيُوشْ الْعَزّْ وَالنّْصَرْ             وَخْيُولِي عَايْمَا ايْمينَا وِيْسَارَا

خَرَجْتْ بَهْمُومِي مَنْ الْجّْبَاحْ لَرْبَابْ التَّمْجِيدْ وَالْفْضَلْ وَالْحَقّْ وُلَسْرَارْ
مَنْ لاَعْكَْرُ عِيبْنَا ابْشَرْ           بَالْخِيرْ ايْقَابْلُ الْقُومْ النَّكَّرَا

جَاوْ اخْرِينْ الدَّوْنِي وُخَلاَّوْ اشْقِيقِي لَلدّْوَا دَفْعُونِي لَلْعَصَّارْ
اصْغَى وَسْمَعْ غَايَتْ الْخْبَرْ         كِيفْ اجْرَا لِي نْعِيدْ  سَمْعِي يَا جَارَا

دَفْعُونِي لَلشَمَّاعْ لـَلـْظَا وَوْزَنْنِّي فَالسُّوقْ مَنْ اجْمَلْتْ اسْلُوعْ التَّجَّارْ
وَ انْصَرَّفْ مَاسْبَقْ فَالسّْطَرْ          حَالي حَالْ الْعْشِيقْ قَصَّا وَعْبَارَا

دَوَّبْنِي يَا فَاهَمْ اللّْغَا لَتَّوْرِيقْ ابْقِيتْ فَلْكَْوَايَل ْفِي كُلْ انْهَارْ
نَتْكََلَّبْ مَافَادْنِي اصْبَرْ               وَعْلَى الطَّنْجِيرْ لِعْتِي مَاتَدَّارَا

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ
أَتَرْيَاقْ عْلاَجْ كُلّْ ضَرّْ               اَبَنتْ الْمُلْكْ لِيكْ هَمَّا وَاتْجَارَا


القسم الخامس

سَطَّرْنِي يَفْتِيلَتْ الْخْدِيعَا فِي قَصْبَا بَالصّْفُوفْ فُوقْ الطَّنْجِيرْ اسْطَارْ 
صَبَّحْنِي يَفْتِيلْتْ الْغْدَرْ           مَاتَرْبَحْ يَاهْلِي الْقُومْ الْغَدَّارَا

ابْنَادَمْ يَاكُلْ ْفِيلْ وِيْبِيعْ اعْضَامُ  باَللّْيُوثْ يَلْعَبْ مَنْ دَارْ الْدَارْ 
ِيْغْلَبْ التَّعْبَانْ وَالنّْمَرْ            وِيْغْمَزْ افْغَايَتْ الْمْكَرْ مَنْ لَغْرَارَا

كَحْلْ الرَّاسْ اخْزَايْبُ اخْزَايْبْ يَغْلَبْ لَطْيَارْ فَلْهْوَى وَالْحُوتْ افْلَبْحَارْ 
مَايَقْوَى لَسْفَايْنُ ابْحَرْ             يَبْنِي الْمْدُونْ وَ الْقْصُورْ افْلْمْحَارَا

لاَكِنْ اهْلَ الْجُودْ مَايْعَرْفُ خَدْعَا يَاشَامْتْ الرّْضَى صِلْ الْحَلْمْ ابْرَارْ 
طَبْعْ الْجُودْ اشْرِيفْ مَشْتْهَرْ        مَحْلُوبْ  احْلِيبْ مَامْكَدَّرْ بَكْدَارَا

وَصْغَايْ انْفِيدَكْ يَالشَّمْعَا بَعْقُوبَتْ خِيرْ لاَتْتَبْعِي مَكْرُوهْ افْعَارْ 
وَلِّي جَا بَلْغْدَرْ يَنْغْدَرْ             وَالصَّبْرْ امْلِيحْ لاَتْكُونِي  عَكَّارَا

قَالَتْ صَبْريِ مَا يْحَمّْلُوهْ اجْمَالْ الصَّحْرَا وُلاَ اجْمَالْ الشَّرْقْ افْلَقْطَارْ 
بَعْدْ الدَّلْكْ امْشِيتْ نَنْعْبَرْ           واللِّي بَاقِي اِيقَصّْرُوهْ الْقَصَّارَا

شَعْلوُنِي وَبْقِيتْ شَاعْلاَ عَلْ اَلْعْشِيقْ ابْلِيعَتْ الْهْوَى وَالدَّمْعْ الْغَزَّارْ 
فُوقْ اخْدُودِي بَاللّْظَى اهْمَرْ      وَ اعْلَى الْحَسْكَا دَّارْ ازْفَرَتْ ايْمَارَا

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ
أَتَرْيَاقْ عْلاَجْ كُلّْ ضَرّْ               اَبَنتْ الْمُلْكْ لِيكْ هَمَّا وَاتْجَارَا


القسم السادس

زَادْالْعَاشَقْ قَالْ يَالشَّمْعَا شُفِ حَالِ ابْحَالْ حَالَكْ وَاجَبْ نُعْدَارْ 
حْبِيبِي مَا حَنّْ مَا غْفَرْ            اَنَا وَانْتِ افْضِيقْ شَدَّا وَغْيَارَا

دَابْ اقْلِيبِي بَالْهْوَى كْمَا دَابْ اقْلِيبَكْ بَاللّْظََى لاَحِيلاَ لاَ مُكَْدَارْ 
مَنْ لاَ جَرَّبْ حَالْ مَاعْدَرْ          وَلِّي جَرَّبْ مَاخْفَاتُ لِيشارَا

انْتِ تَبْكِي فَالظَّلاَمْ وَنَا نَبْكِي فالَلِّيلْ وَالنّْهَارْ ابْعَشْقْ الخُلاَّرْ 
ادْمُوعِي وَدْمُوعَكْ كَالْمْطَرْ          خَلْطَتْ لَعْشِيقْ وَالْبْهَا مَاتَتْفَارَا

انْتِ فِيكْ اوْصَافْ حَالْتِي وَنَيَا بَوْصَافْ حَالْنَكْ نَدْبَالْ اُ نْصْفَارْ 
نَتْزَبَّرْ قُدَّامْ مَنْ احْضَرْ               لَفْتِيلاَ دَايْرَا فْقَلْبِي كََطَّارَا

اَنْتِ لَفْتِيلاَ فِي اعْضَاكْ اَشْعِيلاَ وَنَا افْتِيلْ فِي دَاتِي كُلّْ اَنْهَارْ 
وَالْمَكْتُومْ اَلِعْتِي اظْهَرْ           بِينْ الرَّقْبَانْ بَالدّْمُوعْ الْكَطَّارَا

كَانْ ابْكِيتِي يَالْبَاهْيَا لاَمَنْ اِيشَفِّي ابْكَاكْ باللِّيعَا وَالتَّشْحَارْ 
طَعْمْ الْعَاشْقْ لَلْعْشِيقْ مُرّْ          وَعْلَى الْمَعْشُوق شَهْدْ مَافِيهْ امْرَارَا

حَمْلَكْ حَمْلْ اتْقِيلْ يَالشَّمْعَا وَنَا حَالِي انْحِيلْ بَهْوَى صَابَغْ لَشْفَارْ 
دَاتْ الزِّينْ اَفْرِيدْتْ اَلْعْصَرْ           مَنْ تَرْكَتْنِي انْهُومْ فَالْخْلاَ وَعْمَارَا

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ
أَتَرْيَاقْ عْلاَجْ كُلّْ ضَرّْ               اَبَنتْ الْمُلْكْ لِيكْ هَمَّا وَاتْجَارَا


القسم السابع

وَدْوَاتْ الْعَدْرَا الْبَهْيَا زِينَتْ لاَسَمْ تُوكََتْ اللَّبِيَّا نَجْمْ الْغَرَّارْ 
دَاتْ الزِّينْ الْفَايَقْ الْكْبَرْ              مَنْ صَالْتْ بِينْ جَمْعْ الَْبْنَاتْ امْنَارَا

قَالَتْ لَلْشَّمْعَا احْيَاتْ بِكْ اللْيَالِي وَجْوَامَعْ اُكْرَاسَ وَضْوَاتْ اوْكَارْ 
وَالسَّدَاتْ امْقَامْهَا ازْهَرْ               وَمَّاسَمْ وَالْعْرَاسْ فَرْحَا وَبْشَارَا

وَازْهِيتِي يَاشَمْعَتْ الْعْنَايَا فَاحْلِي وَ احْلُولْ وَالْكْسَاوِي دَهْبْ التَّشْحَارْ 
وَزْهِيتِي بَفْنَاجَلْ الْخْمَرْ               قُدَّامْ الْوَالْعَاتْ بِينْ الْخَمَّارَا 
وَزْهِيتِي فَقْبُوبْ الْعْنَايَا فَمْنَازَهْ عَالْيِينْ  بِينْ اعْوَانَسْ وَ ابْكَارْ 
عَنْ ضِيّْ الْوَجْنَاتْ وَالشّْعَرْ         وَسْوَالَفْ حَايْفِينْ وَاتْيُوتْ اكْوَارَا

وَالْغُرَّا وَاجْبِينْ بَرْقْ يَسْطَعْ وَ الْحَجْبِينْ قََوْسْ قَاسُونِي دُونْ اوْتَارْ 
النْوَاجَلْ بالْغَنْجْ وَالشّْعَرْ              تَعْطِي الْبَرُودْ وَالتّْقِيلْ مَنْ اللبَّارَا

وَخْدُودْ الطَّمَّاجْ وَالْمْعِيطَسْ يَحْضِي الشّْفوفْ وَالرّْكََابْ اجْلاَيَبْ لَمْهَارْ 
وَاللِّيمْ اَلِّي تَاكًْ فََالصّْدَرْ               جَهْدْ الكَمْشَا بِينْ جَمْعْ النَّضَّارَا

وَقْدُودْ اسْوَارِ عْلَى اسْفَايَنْ تَعْدَلْ وَتْمِيلْ بَلْغْنَايَمْ وَسْطْ الزَّخَّارْ 
وَالطُّرْقَا قَبْطَانْهَا احْبَرْ                 وَالْبَحْرْيَا طْيُورْ بِيزَانْ احْرَارَا

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ
أَتَرْيَاقْ عْلاَجْ كُلّْ ضَرّْ               اَبَنتْ الْمُلْكْ لِيكْ هَمَّا وَاتْجَارَا


القسم الثامن

وَشْكَاتْ الشَّمْعَا مَنْ اطْوِيَّرْ بُوفَرْطُطُّ شُفْ قَالَتْ مَعْمِي لَبْصَارْ 
جَا يَطْفِي نُورِي  ابْلاَ وْقَرْ           وَجْبَرْ نَارِي عْلَى اقْرَانُ مَشْرَارَا

وَدْوَا لِهَا قَالْ يَا الشَّمْعَا هَدَا وَعْدِي انْصَرّْفُ عَشْقَكْ عَنِّي جَارْ 
وَاللاَّيَمْ فَهْوَاكْ مَاعْدَرْ            اللُّونْ اصْفَارْ وَالْمْدَامَعْ هَمَّارَا 
مَا نَقْرَا لِكْ اَجْمِيلْ ياَلشَّمْعَا زِينَكْ نََكًَّاشْ لَلْبْهََا لاجْمَارْ وُ لاَ نَارْ 
مَنْ يَخْشَى لَهْوَالْ مَاضْفَرْ         وَلِّي مِيسُورْ مَاتْفَكُّ لَحْزَارَا

شُفِي لَنْحُولِي وُحَالْتِي بَايَتْ فَاللِّيلْ الطّْوِيلْ بِينْ اغْصَايَصْ وَمْرَارْ 
مَاقَسِيتْ بَاللّْظَى اكْتَرْ             قَاسِيتُ  بَالجّْفَا وُلَحْسُودْ انْظْارَا

مَانِيَا الاَّ اعْشِيقْ وَانْتِ زِينَا وَالْعَاشَقْ اِيرْمِي رُوحُ عَلْ لَجْمَارْ 
يَسْخَى عَلْ لَمْلِيحْ بَالْعْمَرْ          مَنْ مَاتْ عْلَى الْمْلِيحْ مَا مَاتْ اخْسَارَا

وَدْوَاتْ الشَّمْعَا وُقَالْتْ اشْعَاعِي مَنْ خَدّْ الْمْسَاقْمَا نَلـْْتُ يَاحَضَّارْ 
حَتَّى نُورْ الشَّمْسْ وَالْقْمَرْ        مَنْ نُورْ الْبَاهْيَا الضّْرِيفْ الْمَسْرَارَا

سَلَّمْتْ الشَّمْعَا الاَّلاَّهَا دَابَتْ كَُدَّامْهَا مَنْ الْهِيبَا وَالتَّوْقَارْ 
وَخْتَمْتْ الْمَسْطُورْ بَلْعْطَرْ         مَنْ عَطْرْ اَمّْ التّْيُوتْ مَالَحْ لَكْرَارَا 

صُولِي يَا شَامَا الظْرِيّْفَا وَزْهَا يَا وَلْفِي وُدَنْدنِي قَطْفِي مَالْزْهَارْ
أَتَرْيَاقْ عْلاَجْ كُلّْ ضَرّْ               اَبَنتْ الْمُلْكْ لِيكْ هَمَّا وَاتْجَارَا


تمت القصيدة